1.- SEGURIDADE DE PRODUTOS
A preocupación dos poderes públicos para que os produtos postos no mercado sexan seguros levou á Unión Europea a ditar unha directiva sobre seguridade xeral dos produtos (2001/95/CE, do 3 de decembro) que foi trasposta ao ordenamento xurídico español por medio do Real decreto 1801/2003, do 26 de decembro sobre seguridade xeral dos produtos.
Existen dúas redes de alerta de información sobre a seguridade dos produtos non alimenticios: SIRI a nivel estatal e RAPEX a nivel europeo. Estas redes, que están debidamente coordinadas, permiten que a través delas se informe daqueles produtos perigosos para que as autoridades competentes realicen as actuacións necesarias co fin de impedir a súa comercialización. Estas redes de información funcionan de forma bidireccional de xeito que, non só a través delas se recibe información de produtos perigosos procedentes doutras autoridades de control, senón que cando unha autoridade detecte un produto inseguro debe introducilo nos ditos sistemas para coñecemento xeralizado do resto de autoridades de control.
Por outro lado hai que saliantar que calquera fabricante ou comercializador que teña coñecemento de que introduciu no mercado un produto inseguro ten a obriga de comunicalo ás autoridades de control para a súa inclusión nestas redes.
As actividades de control de mercado orientadas á defensa dos intereses dos consumidores, realizanse a través da inspección de todo tipo de produtos e servizos, co obxectivo de verificar a súa adecuación á normativa aplicable en cada caso, velando pola transparencia das relacións comerciais.
A inspección de consumo controla o cumprimento da normativa de defensa do consumidor mediante as seguintes accións:
• Campañas de inspección
• Investigación de reclamacións presentadas polas persoas consumidoras
• Actuacións relacionadas coa Rede de Alerta de produtos perigosos
• Actuacións de oficio por iniciativa da propia Administración de consumo
2.- TRANSPORTE AÉREO
a.- ¿Onde podo comprar un billete?
A reserva dun billete de avión pode facerse en axencias de viaxes, en compañías aéreas ou a través de diferentes páxinas web, pero a diferenza do de autobús ou do de tren, o billete é nominativo, é dicir, só pode ser utilizado polo titular.
b.- ¿Qué debo facer se o billete se perde ou se deteriora?
En caso de perda ou deterioración do billete, deberá notificalo á compañía, a cal emitirá outro, podéndolle cobrar os gastos de emisión deste.
Unha boa opción é optar naquelas compañías e destinos que así o permitan pola modalidade de billete electrónico. Neste caso, será suficiente que acredite a súa identidade ao chegar ao aeroporto para obter a tarxeta de embarque.
c.- ¿Podo anular a viaxe ou cambiar as datas?
Dependendo da data de cancelación e da tarifa do billete, a compañía aérea pode cobrar determinadas porcentaxes se se pretende anular o billete.
Incluso, existen tarifas nas que non é posíbel a anulación ou cambio de data.; polo que, é importante que valore esta situación antes de proceder á compra do billete.
Outro aspecto a ter en conta, é que en determinadas tarifas de ida e volta, se non se realiza a ida, automaticamente, se cancela a volta.
d.- ¿Qué é o Overbooking?
En ocasións, a compañía aérea realiza máis reservas, que o número de prazas de avión que vai realizar o traxecto; podéndose dar a circunstancia de que un viaxeiro con praza confirmada non sexa admitido ao embarque. Esta situación coñécese co nome de Overbooking.
e.- ¿Qué dereitos teño se me vexo afectado polo Overbooking?
Nestes casos a compañía deberá pedir como medida primeira, que se presenten voluntarios, que renuncien a súa reserva a cambio de determinados beneficios.
No caso de que se lles denegue o embarque aos pasaxeiros contra a vontade destes, o pasaxeiro terá os seguintes dereitos:
• Dereito ao reembolso ou a un transporte alternativo.
a) – Ao reembolso en sete días, do custo íntegro do billete no prezo ao que se comprou, correspondente á parte ou partes da viaxe non efectuadas e á parte ou partes da viaxe efectuadas, se o voo xa non ten razón de ser en relación co plano de viaxe inicial do pasaxeiro, xunto con, cando proceda.
– Un voo de volta ao primeiro punto de partida ou máis rapidamente posíbel;
b) a condución até o destino final en condicións de transporte comparábeis, o máis rapidamente posíbel, ou
c) a condución até o destino final, en condicións de transporte comparábeis, nunha data posterior que conveña ao pasaxeiro, en función dos asentos dispoñíbeis.
• Dereito á atención
a) comida e refrescos suficientes, en función do tempo que sexa necesario esperar;
b) aloxamento nun hotel nos casos:
– en que sexa necesario pasar unha ou varias noites, ou
– en que sexa necesaria unha estancia adicional á prevista polo pasaxeiro;
c) transporte entre o aeroporto e o lugar de aloxamento (hotel ou outros).
Ademais, ofreceráselles aos pasaxeiros gratuitamente dúas chamadas telefónicas, télex ou mensaxes de Fax, ou correos electrónicos.
• Dereito á compensación
Ademais o transportista deberá compensarlles da seguinte maneira:
a) 250 euros para voos de até 1500 quilómetros;
b) 400 euros para todos os voos intracomunitarios de máis de 1500 quilómetros e para todos os demais voos de entre 1500 e 3500 quilómetros;
c) 600 euros para todos os voos non comprendidos en a) ou b).
A distancia determinarase tomando como base o último destino ao que o pasaxeiro chegará con retraso en relación coa hora prevista debido á denegación de embarque ou á cancelación.
No caso de que, se lles ofreza aos pasaxeiros a posibilidade de ser conducidos até o destino final nun transporte alternativo cunha diferenza na hora de chegada respecto á prevista para o voo inicialmente reservado:
a) que non sexa superior a dúas horas, para todos os voos de 1500 quilómetros ou menos, ou
b) que non sexa superior a tres horas, para todos os voos intracomunitarios de máis de 1500 quilómetros e para todos os demais voos de entre 1500 e 3500 quilómetros, ou
c) que non sexa superior a catro horas, para todos os voos non comprendidos en a) ou en b),
O transportista aéreo encargado de efectuar o voo poderá reducir nun 50% a compensación prevista..
f.- ¿Qué dereitos teño se cancelan o meu voo?
Os pasaxeiros afectados terán dereito a unha compensación por parte do transportista aéreo a menos que:
– se lles informe da cancelación polo menos con dúas semanas de antelación con respecto á hora de saída prevista, ou
– se lles informe da cancelación cunha antelación de entre dúas semanas e sete días con respecto á hora de saída prevista e se lles ofreza un transporte alternativo que lles permita saír con non máis de dúas horas de antelación con respecto á hora de saída prevista e chegar ao seu destino final con menos de catro horas de retraso con respecto á hora de chegada prevista, ou
– se lles informe da cancelación con menos de sete días de antelación con respecto á hora de saída prevista e se lles ofreza tomar outro voo que lles permita saír con non máis dunha hora de antelación con respecto á hora de saída prevista e chegar ao seu destino final con menos de dúas horas de retraso con respecto á hora de chegada prevista.
g.- Se o meu voo está retrasado, ¿Qué dereitos teño?
Se un transportista aéreo encargado de efectuar un voo prevé o retraso dun voo con respecto á hora de saída prevista:
a) de dúas horas ou máis no caso de todos os voos de 1500 quilómetros ou menos, ou
b) de tres horas ou máis no caso de todos os voos intracomunitarios de máis de 1500 quilómetros e de todos os demais voos de entre 1500 e 3500 quilómetros, ou
c) de catro horas ou máis no caso de todos os voos non comprendidos nas letras a) ou b),
o transportista ofrecerá en todos os casos:
• comida e refrescos suficientes, en función do tempo que sexa necesario esperar.
• dúas chamadas telefónicas télex ou mensaxes de Fax, ou correos electrónicos.
naqueles casos en que a hora prevista de saída sexa ao día seguinte á hora previamente anunciada:
• aloxamento nun hotel nos casos:
– en que sexa necesario pasar unha ou varias noites, ou
– en que sexa necesaria unha estancia adicional á prevista polo pasaxeiro.
• Transporte entre o aeroporto e o lugar de aloxamento (hotel ou outros).
cando o retraso sexa de cinco horas como mínimo:
• -Reembolso en sete días, do custo íntegro do billete no prezo ao que se comprou, correspondente á parte ou partes da viaxe non efectuadas e á parte ou partes da viaxe efectuadas, se o voo xa non ten razón de ser en relación co plano de viaxe inicial do pasaxeiro, xunto con, cando proceda:
-un voo de volta ao primeiro punto de partida o máis rapidamente posíbel.
h.- ¿Pódenme cambiar de clase?
1. Se un transportista aéreo encargado de efectuar un voo acomoda a un pasaxeiro nunha praza de clase superior a aquela pola que se pagou o billete non solicitará pago suplementario ningún.
2. Se un transportista aéreo encargado de efectuar un voo acomoda a un pasaxeiro nunha praza de clase inferior a aquela pola que se pagou o billete, en sete días, reembolsará:
a) o 30% do prezo do billete do pasaxeiro para todos os voos de 1500 quilómetros ou menos, ou
b) o 50 % do prezo do billete para todos os voos intracomunitarios de máis de 1500 quilómetros excepto os voos entre o territorio europeo dos estados membros e os territorios franceses de ultramar, e para todos os demais voos de entre 1500 e 3500 quilómetros, ou
c) o 75% do prezo do billete para todos os voos non comprendidos en a) ou en b), incluídos os voos entre o territorio europeo dos estados membros e os territorios franceses de ultramar.
i.- ¿Cánta equipaxe podo levar?
Dependendo do destino, o límite máximo da equipaxe está limitado en función do peso, ou do número de vultos. Este sistema fixa o máximo de vultos, o peso e as dimensións concretas que pode transportarse de forma gratuíta. Se se supera calquera destes requisitos (número de vultos, peso por vulto, dimensións de cada vulto), considerarase exceso de equipaxe.
Cada compañía aérea aplica unha franquicia de equipaxe segundo corresponda o sistema de peso ou pezas, dependendo da orixe e do destino do seu voo.
Se vostede voa en conexión con outra compañía aérea, comprobe a franquicia que lle permite a dita combinación, xa que pode variar con respecto á aplicación da primeira.
As liñas aéreas deberán indicar o peso máximo que se pode transportar de forma gratuíta. Se se excede deste peso deberá pagarse unha penalización económica que dependerá do destino onde se viaxe e da cantidade que exceda da súa franquicia.
j.- ¿Cánto se paga por exceso de equipaxe?
As compañías aéreas estabelecerán a contía económica a pagar por cada Kg. de exceso de equipaxe.
k.- ¿Qué debo facer se teño algún problema coa equipaxe?
A compañía aérea é responsábel do dano ou prexuízo que ocasione á equipaxe durante o transporte.
É fundamental no caso de incidencia coa equipaxe facturada (destrución, perda, deterioración ou retraso) acudir inmediatamente ao mostrador da compañía aérea ou ao seu axente de hadling, para formular por escrito nese momento a protesta correspondente, cumprimentando o impreso denominado Parte de Irregularidade de Equipaxe (PIR).
A responsabilidade do transportista no caso de destrución, perda, avaría ou retraso da equipaxe, limítase a 1000 dereitos especiais de xiro (aproximadamente 1100 euros) por pasaxeiro, a menos que o pasaxeiro fixera ao transportista, ao entregarlle a equipaxe facturada, unha declaración especial do valor.
l.- ¿Podo transportar algún artigo perigoso?
Por razóns de seguridade, está prohibido transportar nos avións obxectos como tesoiras, coitelos e toda clase de elementos punzantes. Estes obxectos deberán ser facturados na equipaxe, nunca levalos nos vultos de man. Así mesmo os pasaxeiros non deberán levar nin consigo, nin como equipaxe mercancías perigosas.
m.- ¿Qué podo levar como equipaxe de man?
Dependendo de cada compañía aérea, da orixe ou do destino do voo e incluso da clase na que viaxe, existirán certas limitacións en canto ás medidas e ao peso da equipaxe de man.
Consellos:
– Conservar o billete.
– Comprobar a hora límite de aceptación do voo, que varía dependendo das compañías aéreas e do destino.
– Conservar a tarxeta de embarque e xustificante de facturación.
– No caso de dúbida, sobre as condicións de cada tarifa, dirixirse á compañía aérea ou axencia de viaxes. Igualmente, comprobe a franquicia da equipaxe á que ten dereito.
3.- TELECOMUNICACIÓNS
a.- Unha empresa de telefonía deume de alta sen ter asinado ningún tipo de contrato, ¿Qué podo facer?
Debe enviarlle a comunicación fidedigna á empresa, co obxecto de aclarar esta alta sen consentimento.
No caso de que, recibida a devandita comunicación por parte da empresa, non atendan a súa petición, pode presentar unha reclamación contra a compañía en calquera oficina de consumo.
No caso de que a operadora envíe copia de contrato, pero a sinatura que nel apareza sexa falsa, debería acudir a presentar unha denuncia ante o Xulgado competente ou a Policía.
b.- ¿Cómo debo darme de baixa nos servizos de telefonía que teño contratados?
En primeiro lugar, debería comprobar que o contrato que ten asinado estabeleza nalgunha das súas cláusulas a forma prevista para solicitar a baixa dos servizos.
De non existir a cláusula mencionada, e para maior seguridade, o titular do servizo debería remitirlle a comunicación fidedigna á operadora notificando a súa vontade de causar a baixa.
No caso de que a empresa continúe emitindo facturas polo servizo, podería presentar unha reclamación ante calquera oficina de consumo.
c.- A operadora que me subministra acceso a Internet, non me presta o servizo nas condicións contratadas (non me aplican as tarifas ofertadas, non podo acceder á velocidade prometida, sufro cortes de conexión constantes,…) , ¿Qué podo facer?
Pode requirirlles de maneira fidedigna para que cumpran as condicións que lle ofertaron. Se aínda así, continuasen os problemas, podería solicitar a baixa definitiva do servizo sen ningún tipo de penalización (aínda que existise, por contrato, un período de permanencia mínimo, que de non cumprirse levaría a unha penalización económica).
d.- Na miña factura telefónica aparecen chamadas a números de tarificación adicional.
En primeiro lugar, pode solicitar a desconexión destas numeracións dende a súa liña telefónica, simplemente comunicándollo á súa operadora.
Cando a factura por estes conceptos xa está emitida, podería deixar de pagar a parte desta correspondente aos servizos de tarifas adicional, sen que isto provocase o corte do servizo telefónico. Para iso, na factura deberá aparecer analizado o importe correspondente a esta serie de chamadas para que o cálculo sexa correcto.
No caso de que xa fora pagada a factura, podería solicitarlles a devolución da parte correspondente a estes servizos (que o prestador de servizo considera prestado aínda que nunca se solicitaran ) presentando unha reclamación ante as xuntas arbitrais de consumo.
e.- Teño solicitada dende hai tempo, a instalación dunha liña telefónica no meu novo domicilio e aínda non dispoño dela.
O prazo máximo marcado para a instalación de novas liñas telefónicas (Servizo básico: teléfono fixo, fax e conexión funcional a Internet) é de 60 días. Se nese prazo non lla instalaran, debe presentar unha denuncia ante a Secretaría de Estado de Telecomunicacións e para a Sociedade de Información, organismo competente neste campo.
4.- VIVENDA
a.- ¿Qué información debe subministrarme o construtor cando merco unha vivenda?
De acordo co R.D. 515/1989 do 21 de abril, o construtor debe facilitarlle unha serie de información sobre a vivenda que pensa adquirir, como pode ser: descrición do inmoble (superficie útil e descrición do edificio no que esta se atopa ); memoria de calidades (exhaustiva e incluíndo referencia aos illamentos térmicos e acústicos empregados); planos da vivenda e o seu emprazamento; trazados de redes eléctricas, gas e auga; prezo total e forma de pago.
b.- Merquei unha vivenda sobre plano e debo entregar cantidades á conta, ¿cómo se aseguran esas cantidades?
O construtor-promotor deberá entregarlle un aval bancario ou póliza de seguro sobre as cantidades que perciba ao longo do proceso de construción sen que a vostede lle supoña desembolso adicional ningún.
c.- O construtor non me entrega a vivenda mercada sobre plano no prazo fixado no documento de compravenda, ¿podo reclamarlle algún tipo de compensación?
Neste caso existiría incumprimento de contrato e tería que examinarse o documento de compravenda comprobando se existe cláusula penal cando se dea esta circunstancia.
De non existir, tería que negociar coa outra parte unha compensación por este retraso na entrega da vivenda e de non chegar a acordo, acudir aos Tribunais ordinarios solicitando indemnización.
d.- Comezan a aparecer defectos na vivenda que merquei recentemente, ¿podo reclamar?
Nesta cuestión o primeiro a determinar sería a lexislación aplicábel.
Se a licenza de obra baixo a que se construíu a vivenda en cuestión, é anterior ao 6 de Maio de 2000, todos os defectos que se manifesten ao longo de 10 anos estarían garantidos polo construtor.
Se a licenza de obra fose posterior a esa data, o prazo de garantía sería diferente dependendo do defecto do que se trate (1, 3 ou 10 anos).
Cando exista garantía en vigor, deberá notificarlle fidedignamente ao construtor a existencia dos defectos que xurdiran, para que proceda á súa correción. Se non atendese a este requerimento, podería presentar reclamación en calquera oficina de consumo ou ante o Xulgado competente.
5 Solicitei unhas modificacións na vivenda que merquei sobre plano, como teño que especificalas ?
Segundo o art. 10 do R.D. 515/1989 do 21 de abril: ” As reformas que propoñan os adquirentes serán así mesmo obxecto de formalización documental que conterá sucinta descrición do su contido e concretas repercusións que deriven no prezo e prazo de entrega que se pactasen ”
Consulta vía telefónica: 900 23 11 23 (Teléfono gratuíto, de Luns a Venres de 09:00 a 14:00 hrs.)
Consulta vía web: [Premer aquí para realizar unha consulta ao Instituto Galego de Consumo]