Este venres 27 de outubro dará comezo a nova edición de “Diálogos en educación”, cun cambio de última hora na orde dos faladoiros, por problemas de axenda dos poñentes: en lugar de Juan J. Bueno Aguilar, que pasa a poñer sobre a mesa o tema do “multiculturalismo nas aulas” o próximo venres 10 de novembro, a encargada de iniciar este ciclo será Joana L. Pereira, psicóloga do Centro San Xerome Emiliani, que falará de “Educación consciente: baseada en mindfulness”.
Existen evidencias científicas que suxiren que a aprendizaxe, a atención e a memoria están profundamente influídos polas emocións. Se estamos bloqueados emocionalmente, debido a múltiples causas, é moi difícil aprender. En cambio, se algo nos apaixoa, a aprendizaxe flúe sen que nos decatemos. Mindfulness para nenos e nenas responde á gran necesidade para encontrar un pouco de tranquilidade, tanto física como mental, entre tantas horas de colexio, actividades extraescolares, deberes, celebracións… baseándose en técnicas de relaxación e de meditación.
A cita será na Casa dos Alonso ás 20:30 h.