O catálogo da exposición conmemorativa dos cen anos do MASAT xa está dispoñible
A exposición “Viaxando pola historia, cen anos do MASAT”, conmemorativa do centenario do Museo Arqueolóxico Santa Trega, xa conta co catálogo da mostra a disposición dos visitantes. Composto por un total de 176 páxinas, as persoas interesadas poderán adquirilo por un prezo de 10 euros.
O catálogo da mostra, que foi inaugurada o pasado xoves 27 de xullo, recolle a historia do MASAT, o primeiro museo arqueolóxico de Galicia aberto ó público en xuño de 1917.
Aqueles que desexen coñecer e aproximarse un pouco máis á historia do Museo, sempre vinculado á actividade que realizaron os seus creadores da Sociedade Pro-Monte, poden achegarse á mostra exposta na Casa dos Alonso. O horario de apertura ó público é, de martes a sábado, de 12.00 a 14.00 horas e de 19.00 a 22.00 horas, e os domingos e días festivos en horario de mañá (de 12.00 a 14.00 horas).